最近蜜运中的艺人洪永城（Tony）昨日与萧正楠（Edwin）、何远东等到屯门拍摄TVB新剧《黄金有罪》，众人以70年代打扮开工，剧中Tony及Edwin大展篮球技术，引得三位美女邓以婷、吴沚默及李松蔓（前名李天纵）拍掌欢呼。

翠如出口老公出手

球技了得的Tony表示以前在新西兰有代表区出赛，问到运动型女友梁诺妍可有见过他打篮球？他笑说：“未！睇咗我惊佢会再爱我多啲！”吓得Edwin急急扮走！问到除夕可有安排庆祝活动？Edwin表示太太黄翠如提议他炮制日式火锅：“佢讲完咪又系我煮！（预埋Tony？）可以！食净啲嘢畀佢，或者留番啲骨头，放喺门口叫佢拎。”

问Tony可会想跟女友二人世界过拍拖后第一个除夕？他表示未有想法：“都唔一定要两个人，可以约朋友。（会出街倒数？）又唔系特别有兴趣喎。”此时Edwin说：“唔好净系带人返屋企，要带佢见吓呢个世界?嘛！”

希望佢唔好辜负人

Edwin又指戥Tony找到女友开心，并笑说：“希望佢认认真真，唔好辜负人哋时间，都好戥佢开心嘅，大时大节唔使做孤儿仔，又唔使冤住啲朋友。（佢有冇骚女友啲相？）之前冇，近期开始有，话佢女友成日跑步，好健康。”

Tony即表示拍拖很低调，很少公开赞女友，Edwin再加把口笑说：“我哋都唔会刻意叫佢介绍，都唔知呢个几耐，如果介绍完，下次见又唔系呢个就……”Tony说：“我唔反驳喇！交畀时间，真实嘅行动会搞掂呢啲谣言！”

何远东爆分外风骚

剧中何远东以咸鱼、冬菇及虾米追女仔，饰演海味铺少东的他笑言若出动贵价花胶可能有效，又大爆Tony有拖拍后分外风骚：“令我羡慕又妒忌，佢搵到个咁好嘅女仔，我都锺意运动型。（佢平时有冇讲起女友？）有听到佢讲啲冧嘢，但详情唔讲喇！”